Eth conselhèr d’Empresa e Treball, Eduardo Valdecantos, acompanhat peth vicepresident 3au dera Deputacion de Lleida, Pau Perdices, a presentat en Conselh Generau d’Aran eth programa Rurau 100 d’acompanhament integrau entà emprenedors dera Val d’Aran que vòlen crear o mielhorar era sua empresa.
Pòden accedir es persones que volguen méter en marcha ua naua activitat empresariau o innovar e créisher ena sua empresa.
Tal e com a explicat Valdecantos, aguest programa consistís en acompanhar as emprenedors dera Val d’Aran ena creacion des sues empreses “en un moment economicaments complicat ei important qu’es iniciatiues agen aguest assessorament professionau. Es empreses an d’auer un component d’innovacion e era activitat s’a d’amiar a tèrme ena Val d’Aran, maugrat que pòden apartier ath sector economic que sigue.”
Eth programa se desvoloparà en tres estapes. Era prumèra consistirà ena captacion d’emprenedors a trauès de campanhes de difusion deth programa. Era dusau analisarà es modèls de negòci e era tresau consistirà ena metuda en marcha des projèctes viables en tot garantir eth finançament e un equip de collaboradors.
Eth programa, finançat pera Deputacion de Lleida, ei impulsat pera Deputacion de Lleida e GlobaLleida e l’amiarà a tèrme era Fondacion CEDRICAT.
Ara presentacion tanben a assistit Xesco Espar, un des entrenadors esportius damb mès exits d’Euròpa, ath delà d’èster un conferenciant fòrça impactant, e ei considerat coma un des entrenadors personaus de major impacte en terrenh de Coaching.
Espar a aufrit ua conferéncia jos eth nòm: “Tot càmbie, e tu?”.
